Jalpy óńirde Naýryz merekesi erekshe atalyp ótpek. О́ńir ákimi baspasóz qyzmetiniń málimetinshe, 300-ge tarta is-shara ótkizý josparlanǵan. Naqtylap aıtsaq, óńirde 5 myńǵa jýyq aǵash kóshetteri otyrǵyzylady, qaıyrymdylyq jáne ekologııalyq aksııalar, áleýmettik marafondar ótkiziledi, konsertter, sporttyq jarystar, kórmeler uıymdastyrylady, sol sııaqty 60 otbasyna jańa úılerdiń kilti beriledi. Bul rette otbasy ınstıtýtyn, ulttyq mádenı dástúrler men qundylyqtardy nasıhattaýǵa erekshe kóńil bólinbek. .
Oblystyq mádenıet, arhıvter jáne qujattama basqarmasynyń málimetinshe, Naýryznamanyń jalpyulttyq onkúndigi aıasynda óńirdegi Naýryz merekesi búkil eldegideı 14 naýryzda «Kórisý – Amal merekesimen» bastalyp, 23 naýryz «Tazarý kúninde» aýqymdy ekologııalyq aksııamen túıindeledi.
«Jalpy óńirde bıyl túrli baǵyttaǵy 234 is-shara ótkiziledi. Mysaly, Mádenıet jáne ulttyq dástúr kúni aıasynda Jetisý oblysynda alǵash ret bir mezgilde 300 balanyń «tusaýyn kesý» rásimi atqarylady. «Shańyraq» kúninde oblys ortalyǵynda 60 otbasy jańa baspanaǵa ıe bolady. «Ulttyq kıim kúni» Taldyqorǵannyń ortalyq alańynda ulttyq kıimder sherýi, sondaı-aq M.Tynyshbaev atyndaǵy tarıhı-ólketaný murajaıynda «Kımeshek» kórmesi uıymdastyrylady. Oǵan qosa jalpy oblys boıynsha ulttyq kıimdi jáne onyń paıda bolý tarıhyn nasıhattaýǵa baǵyttalǵan túrli chellendjder, kezdesýler ótkiziledi. «Yntymaq kúni» merekesi «Naýryz kerýeni» aýqymdy sherýimen aıshyqtalady. Naýryz merekesiniń keń kólemde, jappaı buqaralyq sıpatta atap ótiletin kúni - 22 naýryz. Bul basty mereke Taldyqorǵan qalasynyń «Jastar» saıabaǵynda merekelenip, bıylǵy jyldyń mereıtoılyq datalaryna arnalǵan taqyryptyq kórmeler qoıylǵan 20-dan astam kıiz úı tigiledi», - delingen basqarmanyń habarlamasynda.
Jalpy Naýryzdyń qurmetine merekelik bezendirýge erekshe kóńil bólinbek. Máselen, Taldyqorǵan qalasynyń ortalyq alańynda «Altybaqan» átkenshegi, kıiz úı keıpinde aýqymdy ınstallıasııa ornatylady, sondaı-aq jaryq shamdarymen bezendirý jańartylady. Jalpy Taldyqorǵan qalasy, aýdan ortalyqtary, óńirdiń qalalary men aýyldary Naýryzdy, kóktem mezgilin beıneleıtin túrli shaǵyn sáýlet nysandarymen, sondaı-aq merekelik bannerlermen, jalaýshalarmen bezendiriledi. Sonymen qatar, kógaldandyrý jumystary aıasynda bıyl óńirde 120 myń kóshet, onyń ishinde Naýryz merekesi kúnderi 5 myń kóshet otyrǵyzý josparlanǵan
